um_hopinn

Hópurinn á
bakvið skilaboðin

Ísland stendur á tímamótum. Opið sjókvíaeldi á laxi er að ryðja sér til rúms meðfram ströndum landsins þrátt fyrir skýra andstöðu almennings. Sjókvíar ógna villtum laxastofnum, menga firði, ýta undir matvælaóöryggi með því að breyta ætum smáfiski í fóður og grafa undan orðspori Íslands sem lands ósnortinnar náttúru. Þetta er skammtíma hagnaður fárra á kostnað langtíma verndar náttúruauðlinda okkar og íslenska hagkerfisins.

Árið 2024 skrifuðu tæplega 59 þúsund manns undir undirskriftalista gegn opnu sjókvíaeldi og yfir 300 umsagnir bárust í samráðsgátt, flestar andvígar.

Komdu með í baráttuna. Með samtakamættinum getum við stöðvað þessi mistök.
‍

Hópurinn

VALA
ÁRNADÓTTIR

Vala er ötul baráttukona fyrir verndun villtra laxastofna. Hún tengdi hópinn saman og er ein helsta talskona breiðfylkingar okkar, og að auki stjórnarmeðlimur í Íslenska náttúruverndarsjóðnum (IWF).

VALAARNA.COM

ELVAR ÖRN
FRIÐRIKSSON

Elvar Örn er verkefnastjóri Verndarsjóðs villtra laxastofna á Íslandi og dyggur talsmaður verndunar villta laxastofnsins í Norður-Atlantshafi.

NASF.IS

ELÍAS PÉTUR VIÐFJÖRÐ
ÞÓRARINSSON

Elías er verkefnastjóri hjá Verndarsjóði villtra laxastofna á Íslandi, en hóf störf sem sjálfboðaliði. Hann nýtir reynslu sína sem leiðsögumaður við fremstu laxveiðiár landsins í baráttunni fyrir björgun tegundarinnar.

VEIGA
GRÉTARSDÓTTIR

Veiga varð fyrst allra til að róa kajak rangsælis eftir strandlínu Íslands og hefur tekið ótal myndir úr ferðalögum sínum um landið. Hluti af hennar myndum hafa sýnt fram á slæman aðbúnað og ástand laxa í sjókvíaeldi á Íslandi og hafa hjálpað við að sýna raunveruleikann á bakvið þennan iðnað.

Benedikta Guðrún
Svavarsdóttir

Eigandi elsta fyrirtækisins á Seyðisfirði og stofnfélagi í VÁ!, félagi um vernd fjarðar! Heimur hennar breyttist þegar upp komu áform um sjókvíaeldi í firðinum árið 2020, sem ógnuðu bæði viðskiptum hennar og lífsháttum. Síðan þá hefur hún unnið sleitulaust í baráttunni fyrir þeirri framtíð sem hún og samborgarar hennar vilja sjá fyrir sitt samfélag – þar sem lífshættir þeirra, náttúran og lýðræði eru virt.

Jón
Kaldal

Jón kemur að stefnumótun og er um leið talsmaður Íslenska náttúruverndarsjóðsins (e. Icelandic Wildlife Fund) sem eru óhagnaðardrifin grasrótarsamtök. Hann starfaði sem ritstjóri íslenskra blaða og tímarita í 25 ár og ljær nú rödd sína baráttunni fyrir verndun lífríkis og náttúruauðlinda Íslands, þar á meðal villta Atlantshafslaxinum.